တစ်သက်လုံးလက်တွဲဖို့အတွက်လက်ထပ်တော့မယ်ဆိုရင် အများကြီးအချိန်ယူစဉ်းစားမှ တော်ကာကြတာပါ။
ချစ်တာတော့ချစ်တာပေါ့ ဒါပေမဲ့ တစ်သက်လုံးချစ်နိုင်မလား၊ နားလည်ပေးနိုင်ပါ့မလားဆိုတာတွေကလည်း ရှိသေးတာကိုး။ ကိုယ့်ဘဝတစ်လျှောက်လုံး သူနဲ့ပဲဖြတ်သန်းချင်လာပြီဆိုရင်၊ လက်ထပ်တော့မယ်ဆိုရင် ဒီအခြေအနေတွေကိုဖြတ်သန်းပြီးပြီဆိုတော့မှဆုံးဖြတ်စေချင်ပါတယ်နော်။
ခရီးအတူထွက်ပါ
ခရီးတိုလေးမဟုတ်ဘဲနဲ့တကယ်ကိုကြီးမားတဲ့ခရီးတစ်ခုကို အတူတူသွားကြည့်ပါ။ ဘယ်လိုမျိုးလဲဆိုရင် နှစ်ယောက်အတူပျော်ရတာချည်းမဟုတ်ဘဲ အတူတူလုပ်ဆောင်ရမယ့်အရာတွေ၊ ခံစားချက်တွေကို အပြောင်းအလဲလေးတွေ ဖြစ်သွားစေမယ့်ခရီးမျိုးပါ။ နေရာက အဓိကမကျပါဘူး။ နှစ်ယောက်လုံးအတွက် စိန်ခေါ်မှုတွေဖြစ်လာစေမယ့် ခရီးမျိုးကို အတူတူသွားကြည့်ပါဦး။
အကြီးအကျယ်သတ်ပြီး အောင်အောင်မြင်မြင်ပြေလည်သွားတယ်
တစ်ယောက်ကိုတစ်ယောက် မခေါ်နိုင်မပြောနိုင်ဖြစ်ရလောက်အောင်ရန်ဖြစ်ကြပြီးမှ ပြန်ပြေလည်သွားကြတာမျိုး ဖြစ်ဖူးပြီလား။ တစ်ယောက်ကိုတစ်ယောက်ထိခိုက်နစ်နာအောင်မလုပ်မိဘဲ ရန်ဖြစ်နေတာတွေကိုအဆုံးသတ်နိုင်ခဲ့ပြီးပြီလား။ စကားများရန်ဖြစ်တာ၊ စိတ်ဆိုးစိတ်ကောက်တာက စုံတွဲတိုင်းကြုံနေရတဲ့ကိစ္စလေ။ အဲ့လိုအချိန်မျိုးမှာ စိတ်ထဲနာကျင်သွားလောက်အောင်ဒဏ်ရာတွေမရစေဘဲ ပြေလည်သွားအောင်ဖြေရှင်းတတ်အောင် ကြိုးစားကြည့်ပြီးမှ အိမ်ထောင်သည်ဘဝကို စိတ်ကူးသင့်ပါတယ်။
နောက်ခံအကြောင်းတွေပြောပြီးပြီလား
ကိုယ့်ရဲ့ ငယ်ဘဝကိစ္စတွေ၊ အတိတ်ဖြစ်ရပ်တွေနဲ့ မိသားစုအကြောင်းတွေပြောပြီးကြပြီလား။ ဖုံးကွယ်လိမ်ညာထားပြီးလက်ထပ်တာထက် ပွင့်ပွင့်လင်းလင်းပြောပြတိုင်ပင်ပြီးမှ ရှေ့ဆက်ကြတာကသာမှန်ကန်တဲ့နည်းဖြစ်ပါတယ်။တကယ်ချစ်တဲ့လူဆိုတာ အတိတ်ကိုပြန်တူးဖော်ပြီးအပြစ်ရှာနေမှာမဟုတ်ဘူး။ ရှေ့ဆက်ဖို့ကိုပဲအာရုံစိုက်မယ့်လူမျိုးပါ။
ငွေရေးကြေးရေးမျှဝေတယ်
သူကတော့ယောက်ျားလေးပဲ အိမ်ထောင်ကျပြီးရင်လုပ်ကျွေးပေါ့တို့၊ မင်းကပိုက်ဆံရှိတာပဲမင်းပဲရှင်းတို့ ဆိုတဲ့တစ်ဖက်သက်ဆန်တာတွေကတကယ့် အချစ်မဟုတ်ပါဘူးနော်။ အတူတူသွားကြစားကြတဲ့အခါ ကုန်ကျစရိတ်ကိုမျှခံတာမျိုး ဖြစ်သင့်ပါတယ်။ ငွေရေးကြေးရေးပိုင်းမှာ တစ်ယောက်တည်းကိုမှီခိုနေတာမျိုးက ရေရှည်ဆိုရင်အဆင်မပြေနိုင်ပါဘူး။ ဖြစ်သင့်တာကတော့ နှစ်ယောက်စာဘတ်ဂျတ်ကိုထုတ်ထားပြီး အဲ့ဒီဘတ်ဂျတ်နဲ့လောက်အောင်သုံးတာ အကောင်းဆုံးပါ။
လုံလောက်တဲ့ရင်းနှီးကျွမ်းဝင်မှု
နိုင်ငံခြားမှာဆိုရင်တော့ လက်မထပ်မီအတူတူနေကြည့်ကြပါသေးတယ်။ ဘဝကိုအတူတူဖြတ်သန်းကြည့်ဖို့အတွက်အဆင်ပြေ၊ မပြေဆိုတာကိုသိရအောင်လို့လေ။ မြန်မာ့ယဉ်ကျေးမှုမှာတော့ ဒီလိုမျိုးကသိပ်မရှိဘူး။ အကောင်းဆုံးကတော့ နှစ်ယောက်သားနီးနီးကပ်ကပ်နေကြည့်ဖို့ပါပဲ။ သူ့အိမ်သားတွေနဲ့ရော သူနဲ့ပါ ကိုယ်ကရင်းနှီးကျွမ်းဝင်နေပြီဆိုရင် အကောင်းဆုံးပေါ့။ သူ့အကျင့်စရိုက်၊ စိတ်နေစိတ်ထားတွေကို ဂဃနဏ သိထားပြီးတော့မှလက်ထပ်ဖို့ပါပဲ။ သမီးရည်းစားဘဝတုန်းကအရမ်းချစ်ပြသလောက် အိမ်ထောင်ကျတော့မှဆူဆဲရိုက်ပုတ်တဲ့စရိုက်တွေပေါ်လာလို့ ကွဲကြကွာကြရတာဟာဒီလိုမျိုးလုံလောက်တဲ့ ရင်းနှီးမှုမရခဲ့လို့ပါ။
Credit : Duwun