ရန်ကုန်တိုင်းဒေသကြီး ရွှေလုပ်ငန်းရှင်များအသင်း ၁၂ ကြိမ်မြောက် နှစ်ပတ်လည်အစည်းအဝေးကို ဇန်နဝါရီ ၂၃ ရက်က ပန်းဘဲတန်းမြို့နယ် ရွှေဘုံသာလမ်းရှိ ရန်ကုန်တိုင်းဒေသကြီး ရွှေလုပ်ငန်းရှင်များ အသင်းရုံး၌ Online Meeting ပုံစံဖြင့် ကျင်းပသည်။
ရှေးဦးစွာ ရန်ကုန်တိုင်းဒေသကြီး ရွှေလုပ်ငန်းရှင်များ အသင်းနာယကဦးဘသန်းနှင့် အသင်းဥက္ကဌ ဦးမျိုးမြင့်တို့က အမှာစကားပြောကြားသည်။ ထို့နောက်အသင်း၏ ဥပဒေအကြံပေး ဦးကျော်ငြိမ်း (တရားလွှတ်တော်ရှေ့နေ) က ဆောင်ရွက်ပြီးစီးခဲ့သည့်
လုပ်ငန်းများကို သုံးသပ်ပြောကြားသည်။ ယင်းနောက် အသင်းအထွေထွေအတွင်းရေးမှူး ဦးဝင်းမြင့်က ၂၀၂၀ ပြည့်နှစ် နှစ်ချုပ်အစီရင်ခံစာနှင့် ငွေစာရင်းရှင်းတမ်းများကို တင်ပြ၍ အတည်ပြုလျက် ရယူသည်။
ဆက်လက်၍ အသင်းနာယက ဦးဆန်းလွင်က ၂၀၂၁ - ၂၀၂၃ ခုနှစ်အတွက် ရွေးချယ်တင်မြောက်ခြင်း ခံရသည့် ဥက္ကဌ ဦးမျိုးမြင့်၊ အထွေထွေအတွင်းရေးမှူး ဦးဝင်းမြင့်တို့ ပါဝင်သည့် အမှုဆောင်အဖွဲ့ဝင်များ၏ အမည်စာရင်းကို ဖတ်ကြားတင်ပြသည်။
Online Meeting အစည်းအဝေးတွင် အသင်းအမှုဆောင်နှင့် အသင်းဝင်များက ကိုဗစ် - ၁၉ ကာကွယ်ဆေးရန်ပုံငွေအတွက် အလှူငွေများ ထည့်ဝင်ကြရာ ငွေကျပ်သိန်း ၃၆၀ ကျော်ရရှိသည်။ ဇန်နဝါရီ ၂၈ ရက်နေ့တွင် ရန်ကုန်တိုင်း ဒေသကြီးအစိုးရအဖွဲ့ထံ အသင်းအမှုဆောင်များမှ သွားရောက်လှူဒါန်းကြမည်ဖြစ်ကြောင်း သိရသည်။
အောင်သူရ
