အိမ်ထောင်ဆိုတာ နှစ်ယောက်တစ်ဘဝပေါင်းစည်းလိုက်တာဖြစ်သလို သူစိမ်းနှစ်ယောက်ပေါင်းစည်းကြလို့ မတူညီတာတွေရှိကောင်းရှိကြမယ်။
အိမ်ထောင်သာယာပျော်ရွှင်ဖို့ နှစ်ဦးနှစ်ဖက်စလုံးမှာတာဝန်ရှိပါတယ်။ ဇနီးသည်ဖြစ်တဲ့ သင့်မှာရော၊ ခင်ပွန်းသည်ဖြစ်တဲ့ သူမှာပါတာဝန်ရှိပါတယ်။ ဒါပေမယ့်အိမ်ထောင်တစ်ခုမှာပျော်ရွှင်စွာဖြတ်သန်းသွားရဖို့က ဇနီးသည်ဖြစ်တဲ့ သင့်မှာတာဝန်ပိုရှိပါတယ်။
ဇနီးလိုတစ်မျိုး၊ သူငယ်ချင်းလိုတစ်မျိုး
အိမ်ထောင်ရေးသာယာပျော်ရွှင်ဖို့အတွက် အကောင်းဆုံးသင်ခန်းစာတစ်ခုကတော့ ဇနီးလိုတစ်မျိုး၊ သူငယ်ချင်းလိုတစ်မျိုး နေပေးရမှာပါ။ သူငယ်ချင်းလိုမျိုး ပွင့်ပွင့်လင်းလင်းရင်ဖွင့်လာအောင် ပေါ့ပေါ့ပါးပါးစကားပြောပေးရသလို၊ ဇနီးသည်အဖြစ်လည်း ချစ်ခင်ကြင်နာ၊ နွေးထွေးမှုတွေပေးနိုင်ရမယ်။ အိမ်ထောင်ဖက်အဖြစ် ဆုံးဖြတ်ချက်အတူတူချရမယ်၊ အတူတူပျော်ရွှင်တဲ့ဘဝကို တည်ဆောက်နိုင်ရမယ်၊ အားပေးရမယ်၊ သူငယ်ချင်းအဖြစ် အတူတူရယ်မောပေးရမယ်၊ အစီအစဉ်တွေအတူတူဆွဲရမယ်၊ ဝါသနာတွေ မျှဝေရမယ်၊ ဟာသတွေပြောရင်းနေရမယ်။ ဒီလိုမျိုးဖြစ်နေမှ သင့်တို့ရဲ့အိမ်ထောင်ရေးဘဝက သာယာပျော်ရွှင်မှာပါ။
အတူတူရယ်မောပါ
အိမ်ထောင်ရေးသာယာပျော်ရွှင်ဖို့ အရေးကြီးဆုံးအချက်ကတော့နေ့တိုင်းရယ်မောပေးပါ၊ ပြုံးပေးပါ။ ရယ်စရာတွေပြောရင်း အတူတူရယ်မောပေးပါ။ သူ့ဆီမှာလည်း အလုပ်ကစိတ်ဖိစီးမှုတွေရှိသလို သင့်မှာစိတ်ဖိစီးမှုရှိနေမှာပါ၊ ဒီလိုဆို တစ်ယောက်နဲ့တစ်ယောက် ဟာသလေးတွေပြောရင်း၊ စနောက်ရင်း၊ အတူတူရယ်မောပေးကြပါ။ ဒီလိုရယ်မောပေးတာက သင်တို့အိမ်ထောင်ရေးအတွက် ဆေးကောင်းတစ်လက်ပါပဲ။ ဒီလိုအတူတူရယ်မောပေးရင်း သင်နဲ့သင့်ခင်ပွန်း ဆက်ဆံရေးပိုကောင်းလာသလိုစိတ်ဖိစီးမှုတွေလျော့နည်းသွားစေလို့ အိမ်ထောင်ရေးသာယာပျော်ရွှင်မှာပါ။
ပြင်ပြင်ဆင်ဆင်နေပါ
ချစ်သူဘဝတုန်းကလိုမျိုးပဲ သင့်အလှကိုထိန်းသိမ်းထားပါ။ လှအောင်နေခိုင်းတယ်ဆိုတာကလည်း အမျိုးသမီးတိုင်းရဲ့ယုံကြည်မှုတိုင်းက အလှအပနဲ့လည်းသက်ဆိုင်နေတယ်။ ကိုယ့်ကိုယ်ကိုလှတယ်လို့ယူဆနေချိန်က ကိုယ့်ကိုယ်ကို ယုံကြည်မှုအရှိဆုံးအချိန်ပါပဲ။ တချို့အိမ်ထောင်သည်အမျိုးသမီးတွေက ရုံးအလုပ်၊ အိမ်အလုပ်၊ ကလေးအလုပ်တွေကိုဖိလုပ်နေရင်းနဲ့ ကိုယ့်ကိုယ်ကိုလှအောင်နေဖို့ရာမေ့နေတတ်ကြတယ်။ မိတ်ကပ်ကြီးအဖွေးသားနေခိုင်းတာမျိုးထက် သပ်သပ်ရပ်နဲ့မွှေးကြိုင်နေအောင်နေခိုင်းတာပါ။ ဒါမှသင့်တို့အိမ်ထောင်ရေးဘဝ ရေရှည်ပျော်ရွှင်လာမှာပါ။
ဘယ်အရာကိုမှ ပြောင်းလဲပစ်ဖို့မကြိုးစားပါနဲ့
သင့်အိမ်ထောင်ရေး ရေရှည်သာယာပျော်ရွှင်ချင်တယ်ဆိုရင် တစ်ယောက်နဲ့တစ်ယောက် ပွင့်ပွင့်လင်းလင်းပြောပေးဖို့လိုပါတယ်။ အိမ်ထောင်ရေးမှာ ပြောင်းလဲပစ်လို့မရတဲ့အရာကတော့ သင့်ခင်ပွန်းသည်ကို သင်ဖြစ်စေချင်တဲ့ပုံစံမျိုး ပြောင်းလဲပစ်ဖို့ မကြိုးစားလိုက်ပါနဲ့။ ဒီလိုပြောင်းလဲပစ်မယ့်အစား သူ့ရဲ့အရှိအတိုင်းကို လက်ခံယုံကြည်ပေးပါ။ သူနဲ့ပတ်သက်ပြီး ကြိုက်တဲ့အရာတွေကို စာရင်းရေးထားပေးပါ၊ အဲ့အရာအပေါ်ကိုပဲအာရုံစိုက်ပေးပါ။
အလုပ်လုပ်ပါ
အလုပ်လုပ်ပေးပါ။ အလုပ်လုပ်ခိုင်းတယ်ဆုိုတာကလည်း အမျိုးသမီးတိုင်းကိုယ့်ခြေထောက်ပေါ်ကိုယ်ရပ်နိုင်အောင်နဲ့ ကိုယ့်ဘဝရဲ့ကောင်းစေ၊ ဆိုးစေအရာတွေကို ကိုယ့်ကိုယ်တိုင် ဆုံးဖြတ်ချက်ချနိုင်အောင်လို့ပါ။ မိဘဘယ်လောက်ချမ်းသာနေပါစေ၊ ကိုယ့်ယောကျာ်းကဘယ်လောက်ပိုက်ဆံရှာနိုင်ပါစေ အလုပ်လုပ်ဖို့တိုက်တွန်းပါရစေ။ ကိုယ်ပိုင်ရှာလို့ရတဲ့ငွေမှသာ အမှီအခိုကင်းကင်းနဲ့ ကိုယ့်ကိုယ်ကိုယုံကြည်မှုရှိလာစေတဲ့ဘဝမျိုးကိုပိုင်ဆိုင်ရမှာပါ။
Source : Auntymay