လက်ထပ်ပြီးနောက်မှာ အိမ်ခွဲနေမလား၊ မိသားစုဝင်တွေနဲ့ပဲဆက်နေမလား
ဒါမှမဟုတ် အိမ်ထောင်ဘက်ရဲ့ မိသားစုဝင်တွေနဲ့ပဲနေမလားဆိုတာတွေးထားရမယ့်အချက်တစ်ချက်ပါ။ မင်္ဂလာပွဲကိစ္စ မစီစဉ်ခင်ကတည်းက လက်ထပ်ပြီးနောက်ပိုင်းအခြေအနေတွေကို တွေးထားဖို့လိုပါတယ်။ လက်ထပ်ပြီးနောက်မှာ အိမ်ခွဲနေ၊ မနေ စဉ်းစားတာတွေနဲ့ ပတ်သက်ပြီး အကြံဥာဏ်လေးတွေဖော်ပြပေးလိုက်ပါတယ်။
လက်ထပ်ပြီးနောက်အိမ်ခွဲနေမယ်ဆိုရင်
လက်ထပ်ပြီးနောက် အိမ်ခွဲနေမယ်ဆိုရင် အစအဆုံး အားလုံးကကိုယ်ပဲ လုပ်ဆောင်ရမှာပါ။ ကိုယ့်အိမ်ရဲ့ အသေးအမွှားလိုအပ်ချက်တွေကအစ ကိုယ်ပဲစီစဉ်ဆောင်ရွက်ရမှာပါ။ မိသားစုဝင်တွေ ရှိနေသလိုမျိုးတော့ တစ်ယောက်တစ်လက် ဝိုင်းဝန်းဆောင်ရွက်တာမျိုးမရှိပါဘူး။ နောက်တစ်ခုကတော့ ကိုယ့်အိမ်ထောင်ဘက်ရဲ့အလုပ်ပါ။ ကိုယ့်အိမ်ထောင်ဘက်ရဲ့အလုပ်က နယ်ဝေးခရီးထွက်ရတာမျိုးဆိုရင် ကိုယ်တစ်ယောက်တည်း အိမ်မှာ ကျန်နေရဲလားဆိုတာတွေးပါ။ ဒီအချက်တွေကို တွေးပါနော်။ အိမ်ခွဲနေမယ်ဆိုရင် နောက်ထပ် ကြုံနိုင်တဲ့အချက်ကတော့ အိမ်မှုကိစ္စတွေပါ။ နှစ်ယောက်တည်းလည်း အိမ်မှုကိစ္စတွေကရှိတာပါပဲ။ အလုပ်တစ်ဖက်နဲ့ဆိုရင် အိမ်မှုကိစ္စတွေလုပ်နိုင်မလားဆိုတာ စဉ်းစားပါ။ နှစ်ယောက်တည်းအိမ်ခွဲနေမယ်ဆိုရင်တော့ လွတ်လွတ်လပ်လပ်နေရမှာသေချာပါတယ်။ ကိုယ့်အိမ်မှာနှစ်ယောက်တည်း စိတ်ကြိုက်အဆင်ပြေသလိုနေလို့ရပြီး လင်မယားနှစ်ယောက်ရန်ပဲဖြစ်ဖြစ်ပြန်ပဲချစ်ချစ် စိတ်ပူစရာမရှိပါဘူး။ ဒီတော့ အိမ်မှုကိစ္စ နိုင်နင်းတယ်၊ တစ်ယောက်ကခရီးသွားရင်လည်း အိမ်မှာနေကျန်ဖို့အဆင်ပြေပြီး လွတ်လွတ်လပ်လပ်နေချင်တယ်ဆိုရင်အိမ်ခွဲနေပါနော်။
မိသားစုဝင်တွေနဲ့နေမလား
မိသားစုဝင်တွေနဲ့ နေမယ်ဆိုရင်ကြိုတင်ပြီး သိထားရမယ့်အချက်ရှိပါတယ်။ အဲဒါကတော့မိသားစုဝင်တွေဖြစ်တဲ့ ယောက္ခမ၊ ယောင်းမ၊ ယောက်ခ၊ ခဲအို၊ မတ် အစရှိတာတွေနဲ့ကိုယ်နဲ့ အဆင်ပြေမလား၊ အိမ်ထောင်ဘက်ကရော ကိုယ့်မိသားစုနဲ့လိုက်နေရင် အဆင်ပြေနိုင်မလားဆိုတာကြိုပြီး စဉ်းစားပါ။ အတူတူနေလိုက်တော့မှ အဆင်မပြေတော့တာ၊ Type မတူတာတွေဖြစ်တတ်တာကြောင့်ပါ။ မိသားစုဝင်တွေနဲ့နေမယ်ဆိုရင်တော့ ကိုယ့်ရဲ့အိမ်မှုကိစ္စတွေကို တစ်ယောက်တစ်လက် ဝိုင်းဝန်းတာမျိုးလုပ်ပေးမှာပါ။ ဒါပေမယ့် ကိုယ့်လင်မယားနှစ်ယောက်ပဲ စိတ်တိုင်းကျနေတာမျိုးတော့ မရဘူးပေါ့နော်။ အဓိကက မိသားစုဝင်တွေနဲ့ကိုယ်နဲ့ အဆင်ပြေတယ်၊ ကိုယ့်အခြေအနေကို နားလည်နိုင်တယ်ဆိုရင်တော့ မိသားစုဝင်တွေနဲ့ပဲနေပါ။
လက်ထပ်ပြီးနောက် အိမ်ခွဲနေမလား၊ မိသားစုနဲ့အတူတူနေမလားဆိုတာ သေချာစဉ်းစားရမယ့် အချက်ဖြစ်တာမို့ပြောပြထားတဲ့အကြံဥာဏ်လေးတွေနဲ့စဉ်းစားကြည့်ပါနော်။
Credit : Marry
